Nóg gewelddadige verkragtings in Indië skok

2013-02-06 11:18

Nieu-Delhi – Die Indiese polisie het ‘n man in hegtenis geneem ná hy glo ‘n metaalstaaf in ‘n vrou se keel wou afforseer toe hy haar by haar huis in Nieu-Delhi probeer verkrag het, het ondersoekbeamptes Woensdag gesê.

“Die verdagte het probeer om die meisie te verkrag en toe sy hom teen haar verset, het hy ‘n metaalstaaf by haar mond ingedruk,” het Ajay Chaudhry, ‘n ondersoekbeampte, aan AFP gesê.

“Die verdagte is in hegtenis geneem. ‘n Saak van aanranding en poging tot moord is geopen.”

Hy het bygevoeg dat die slagoffer ‘n operasie moes ondergaan, maar dat sy nou in 'n stabiele toestand is.

Sy het erge beserings aan haar mond en nek opgedoen, het Chaudhry gesê.

In ‘n ander voorval van seksuele aanranding is ‘n 22-jarige vrou se baarmoeder beskadig na ‘n beweerde bendeverkragting in die Uttarakhand-staat.

Die Hindustan Times het berig dat drie mans die vrou verkrag het na hulle haar drankie gedokter het tydens ‘n verjaarsdagpartytjie in Kashipur.

Die polisie is steeds op soek na die verdagtes.

– Volg Nuus24 op Twitter