Nóg 13 000 troepe na Afganistan
2009-10-13 15:14
Washington - President Barack Obama het die ontplooiing van nóg 13 000 Amerikaanse troepe in Afganistan goedgekeur.
Dié getal kom bo-op die 21 000 troepe wat hy in Maart aangekondig het hy na die land sal stuur, het The Washington Post Dinsdag berig.
Die addisionele magte, wat nou deel sal vorm van 34 000 na die Midde-Oosterse land, sal hoofsaaklik ondersteunend van aard wees, en sluit ingenieurs, medici en militêre polisie in.
Die koerant het sy berig op inligting van 'n amptenaar binne die land se departement van verdediging gebaseer.
Volgens die Amerikaanse regering is minstens 4 000 ondersteunende troepe tans oppad Afganistan toe.
Die groep sluit plofstofdeskundiges in.
Hamid Karzai, die president van Afganistan, het Dinsdag in 'n onderhoud met ABC-televisie gesê hy sal meer troepe in sy land verwelkom. Hy het egter nie gespesifiseer hoeveel hy dink sou nodig wees nie.
Die president se goedkeuring van nog troepe beteken daar sal meer troepe in Irak en Afganistan wees as tydens die hoogtepunt van die Amerikaanse teenwoordigheid in Irak tussen 2007 en 2008.
- Sapa-AFP