Nigeriese radio-joernaliste vas oor moorde

2013-02-12 14:20

Kano – Drie radio-joernaliste is in die noorde van Nigerië in hegtenis geneem in verband met die moord Vrydag op minstens nege vroue wat polio-inentings aan plaaslike inwoners verskaf het, het die polisie gesê.

Ibrahim Idris, polisiekommissaris in Kano, het Dinsdag gesê die joernaliste, wat vir Wazobia FM werk, sal aangekla word van strafbare manslag.

Hulle word daarvan beskuldig dat hulle die publiek tot geweld aangehits het in 'n program waartydens die inentings bespreek is. Die joernaliste het na bewering gesê die inentings is teen die beginsels van Islam,  en het aangevoer dat dit deel is van 'n Westerse program om vroue steriel te maak.

Beamptes van die radiostasie kon nie onmiddellik vir kommentaar bereik word nie.

Die radiostasie het verlede week ‘n program uitgesaai wat beskryf het hoe een van sy joernaliste deur regeringsbeamptes aangerand is nadat hy met ‘n man 'n onderhoud gevoer het wat geweier het dat sy kinders inentings ontvang.

– Volg Nuus24 op Twitter


 

- Sapa - AP