Nigeriese dwelmsmokkelaars se plan gefnuik
2012-11-20 10:19
Kuala Lumpur – Die Maleisiese polisie het ‘n Nigeriese sindikaat se plan om $7,1 miljoen (sowat R62 miljoen) se kokaïen in blikkies klappermelk te smokkel, gefnuik.
“Internasionale dwelmsindikate, veral Nigeriese sindikate, probeer gereeld verskeie soorte dwelms by ons land in smokkel,” het Noor Rashid Ibrahim, ‘n polisiebeampte, in ‘n verklaring gesê.
Die beamptes het die dwelms by die Port Klang-hawe gevind. Dit het Maandag per skip vanaf Guyana gekom.
Ibrahim het gesê die middel, wat in ‘n vloeistofvorm is, kan sowat 76 kg kokaïen oplewer as dit verwerk word.
“Die sindikate se modus operandi raak definitief meer gesofistikeerd; dwelms word nou weggesteek deur dit in ‘n vloeistof op te los sodat dit nie deur doeanebeamptes opgespoor kan word nie,” het Ibrahim gesê.
Altesaam 980 houers met blikkies klappermelk en pynappelblokkies is gekonfiskeer.
Niemand is in hegtenis geneem nie, maar Ibrahim het bygevoeg dat die dwelms via Suid-Afrika na Mosambiek op pad was.
– Volg Nuus24 op Twitter
- Sapa - AFP
