Nieu-Seeland: Saak teen dooie man uitgegooi

2012-11-08 12:19

Wellington – ‘n Nieu-Seelandse regter het Donderdag ‘n saak uitgegooi teen ‘n dooie Suid-Koreaanse visserman, het berigte gelui.

Soon Ill Hwang en Dae Jun Lee, twee vissermanne, is in Christchurch se streekhof daarvan aangekla dat hulle onwettig dooie vis in die see gestort het, het die New Zealand Herald berig.

Die klag is deur die departement vir primêre nywerhede aanhangig gemaak.

Soon is egter kort ná die klag vroeër vanjaar aanhangig gemaak is, in ‘n motorongeluk dood. Sy prokureur sê dit was dalk selfs moontlik dat Soon nog nie eens geweet het dat hy deur ‘n hofsaak in die gesig gestaar word nie.

'n Regsverteenwoordiger vir die departement van primêre nywerhede het egter volgehou dat daar geldige redes was vir die saak om voort te gaan, ten spyte van Soon se dood.

Regter Gary MacAskill het dié argument as absurd beskryf.

“'n Mens sou dink dat die dood van die beskuldigde nogal 'n belangrike deel van die saak is,” het MacAskill gesê.

“Ons kan nie dooie mense vervolg nie,” het die regter bygevoeg.

Die saak teen Soon se mede-beskuldigde sal egter steeds voortgaan.

– Volg Nuus24 op Twitter
 

- Sapa - AFP