Newtown-skietery: Kinders weer in skool

2013-01-04 10:21

Monroe – Honderde laerskoolkinders wat die skietery oorleef het waarin 20 van hul klasmaats en ses personeellede afgemaai is, het na ‘n nuut ingerigde gebou teruggekeer om klas te loop.

Die vertraagde begin van die akademiese jaar is ‘n draaipunt vir oorlewendes van die Sandy Hook-laerskool in Newtown, Connecticut, wat sedert die bloedbad op 14 Desember gesluit was.

Onderwysers het hard gewerk om die nuwe gebou in ‘n nabygeleë dorp, Monroe, te transformeer. Supt. Janet Robinson het die nuwe gronde as ‘n “baie vrolike laerskool” beskryf.

Die skieter, Adam Lanza, is onlangs begrawe.

Die familie wou nie enige besonderhede oor die diens verskaf nie. Hulle het slegs aangedui dat dit 'n private geleentheid was.

Lanza het op die kinders en onderwysers losgebrand nadat hy sy ma, Nancy, in hul woning doodgeskiet het. Hy het later selfmoord gepleeg.

Sy ma is vroeër in New Hampshire begrawe.

Volg Nuus24 op Twitter

- Sapa - AFP