Newtown-skietery: Obama besoek skool

2012-12-17 08:35

Kaapstad – Die Amerikaanse president, Barack Obama, het beloof dat hy alles in sy vermoë sal doen om 'n herhaling te voorkom van die skiet-tragedie by die skool in Newtown in Connecticut waartydens 20 kinders en ses volwassenes gesterf het, het RSG Maandag berig.

Obama het Sondagaand die hartseer families van die slagoffers by 'n nagwaak by die skool vertroos.

Mense het in lang toue gestaan om die nagwaak by te woon en na die president se toespraak te luister.

Obama het gesê sulke tragedies sal slegs ophou indien Amerika sy liberale wapenwette wysig.

Die slagoffers is Vrydag by die laerskool met 'n semi-outomatiese geweer doodgeskiet.

Die aanvaller, die 20-jarige Adam Lanza, het na bewering sy ma by haar huis doodgeskiet waarna hy sy skiettog by die skool voortgesit het.

Hy het by die skool selfmoord gepleeg.

'n Polisiewoordvoerder het vroeër gesê sekere mense kan dalk vervolg word, omdat hulle onakkurate inligting oor die slagting op sosiale netwerke bekendgemaak het.

Volg Nuus24 op Twitter.

– RSG