Newtown-skieter se pa is 'hartgebroke'

2012-12-16 11:30

Newtown, Connecticut – Die pa van die 20-jarige Amerikaanse man wat 26 mense, insluitend 20 jong kinders en sy ma doodgeskiet het, het gesê hy is geskok.

Peter Lanza is die pa van Adam Lanza, wat selfmoord gepleeg het kort ná Vrydag se massa-slagting in Newtown, Connecticut. Hy het 'n verklaring aan die TV-kanaal WFSB uitgereik.

"Ons harte gaan uit na die familie en vriende wat geliefdes verloor het en almal wat beseer is. Ons familie is hartseer saam met diegene wat deur die enorme tragedie geraak is," lui die verklaring.

"Geen woorde kan werklik uitdruk hoe hartgebroke ons is nie. Ons is in 'n toestand van ongeloof om antwoorde te probeer vind.

"Ons vra ook hoekom. Ons het ons volle samewerking gegee aan wetstoepassers en sal steeds so doen. Soos so baie van julle is ons bedroef en probeer om sin te maak uit wat gebeur het."

Lanza en Adam se ma, Nancy was geskei. Adam het saam met sy ma in Newtown gewoon en sy was glo sy eerste slagoffer voor hy op ander mense by die skool losgebrand het.

Die vermoorde ma het 'n versameling vuurwapens gehad, insluitend dié wat in die aanval gebruik is.

– Volg Nuus24 op Twitter

- AFP