New York betoog teen Islam-verhoor
2011-03-07 14:54
New York – Sowat 300 mense het Sondag op Times-plein bymekaar gekom om teen ‘n beplande kongresverhoor oor Moslem-terrorisme te betoog.
Die betogers sê dié verhoor is xenofobies. Hulle het ook aangevoer dat dit onregverdig is om Moslems, eerder as ekstremiste, uit te sonder.
Die betogers is onder andere deur die hip-hop-ster Russell Simmons toegespreek. Die imam (leier van die Moslem-gemeenskap) wat 'n projek gelei het om ‘n Islamitiese sentrum naby die World Trade Centre te laat bou, het ook met die skare gepraat.
“Ons regte vyand is nie Islam of Moslems nie,” het die imam Feisal Abdul Rauf gesê.
“Die vyand is ekstremisme en radikalisme en radikale ideologie.”
Simmons het belowe dat die saamtrek na die “volgende generasie” geneem sal word deur bekendes aan te moedig om daaroor te tweet.
Die Keeping up with the Kardashians-ster Kim Kardashian het Sondag getweet dat sy saam met Simmons staan om “liefde en barmhartigheid aan te moedig.”
Volg Nuus24 op Twitter.
- AP