Nepal: Soektog na vermistes duur voort ná sneeustorting

2012-09-25 11:00

Katmandoe – ‘n Span gidse het Dinsdag hul soektog vir drie bergklimmers op een van die wêreld se hoogste berge hervat.

Die drie klimmers is vermis na ‘n sneeustorting hul tente in Nepal op die berg Manaslu meegesleur het. Die polisie het op die oomblik nie hoop dat die mense gered sal kan word nie.

“Op die oomblik het ons nie ‘n idee waar die drie vermiste klimmers kan wees nie. Ons het ‘n span van vyf gidse op ‘n soektog uitgestuur,” het Basanta Bahadur Kunwar, ‘n plaaslike polisiehoof, gesê.

Kenners meen dat iemand wat onder ‘n sneeustorting begrawe word sowat 20 minute het om opgegrawe te word voordat hul weens hipotermie of versmoring sterf.

Die polisie is ook bang dat die mense dalk in ‘n kloof kon val, wat beteken dat hul oorskot dalk nooit gevind sal word nie.

‘n Lugsoektog is Maandag afgelas meer as 24 uur nadat die klimmers as vermis aangemeld is.

“Daar is nie ‘n groot kans dat ons hulle gaan kry nie. As ons hulle nie nou kry nie kan ons hulle dalk eers kry wanneer die sneeu smelt.”

Nege ander klimmers is tydens die sneeustorting dood terwyl vyf mense gered is.

– Volg Nuus24 op Twitter
 

- Sapa - AFP