'Negejarige' wat geboorte skenk, verdwyn
2013-02-08 15:20
Guadalajara – ‘n Mexikaanse meisie wat glo verlede maand op die ouderdom van nege geboorte geskenk het, het verdwyn, en beamptes vermoed nou sy is dalk ouer, het ‘n aanklaer Donderdag gesê.
Hospitaalbeamptes en aanklaers het vroeër die week gesê ‘n negejarige meisie genaamd Dafne het op 27 Januarie geboorte geskenk in die westelike staat Jalisco.
Die polisie is op soek na ‘n ‘n 17-jarige seun wat glo die pa is.
Tomas Coronado Olmis, prokureur-generaal van die staat Jalisco, het Donderdag gesê Dafne se eie geboortesertifikaat het vrae oor haar ouderdom laat ontstaan. Haar ouers het haar geboorte glo eers in 2011 geregistreer.
“Ons het bewyse van onreëlmatighede wat ons moet ondersoek,” het Coronado Olmos gesê. Hy het bygevoeg dat ondersoekbeamptes ‘n sielkundige profiel van die meisie wil saamstel.
Nie Dafne of haar baba was by die adres wat sy aan die hospitaal gegee het nie.
Die ma en haar baba, wat met geboorte 2,7 kg geweeg het, was beide gesond toe hulle uit die hospitaal ontslaan is.
Antonio Munoz, die staat se sekretaris van gesondheid, het twyfel uitgespreek dat Dafne so jonk kon wees.
“Die mediese kenmerke van hierdie minderjarige stem nie ooreen met dié van ‘n negejarige meisie nie. Sy kan baie ouer wees. Sy lyk of sy so 15 kan wees,” het Munoz gesê.
Bronne in die staatsaanklaer se kantoor het Woensdag aan AFP gesê die meisie het erken dat sy ingestem het om seks met die seun te hê.
‘n Ander beampte in die aanklaer se kantoor, Jorge Villasenor, het die voorval egter as "verkragting en kindermishandeling" beskryf.
– Volg Nuus24 op Twitter
- SAPA
