Nege dood in bomaanval
2010-03-26 05:30
Bogota – Nege mense is dood en 51 ander beseer nadat ‘n motorbom Woensdag in Buenaventura, Kolombië ontplof het.
Beamptes in die Valle del Cauca provinsie het aanvanklik bevestig dat drie mense dood en agttien beseer is.
Volgens mediaberigte het van die mense gesterf terwyl hulle besig was om behandeling vir hul wonde te kry. Die meeste beseerdes het brandwonde of gebreekte bene opgedoen.
Die ontploffing het in sentraal Buenaventura plaasgevind, ‘n stad met sowat 350 000 mense.
Die motor, wat sowat 40 kg plofstowwe bevat het, was Dinsdagaand op ‘n perseel geparkeer.
Die aanval het naby die kantore van die burgemeester en die prokureur-generaal gebeur. Een staatsaanklaer, ‘n assistant, twee polisiebeamptes en vier ondersoekbeamptes is in die ontploffing beseer.
Die motief vir die bomaanval is nog nie bekend nie.
Owerhede het ‘n beloning aangebied indien enigeen met inligting na vore kan kom wat hulle sal kan help om die skuldiges vas te trek.
- Sapa-dpa