Nederland swyg oor aanvalle op plase
2011-11-22 07:05
Den Haag – Die Nederlandse regering is nie bereid om met sy Suid-Afrikaanse eweknie oor die epidemie van plaasmoorde in laasgenoemde land in gesprek te tree nie.
Dít blyk uit ’n antwoord van die Nederlandse adjunkminister van buitelandse sake, Ben Knapen, op vrae wat ’n parlementslid, Johan Driessen, aan hom gestel het. Driessen is lid van die Partij voor de Vrijheid (PVV), die mees regse party in die parlement.
Driessen het tydens ’n debat in die Tweede Kamer – die Nederlandse laerhuis – gesê die grondhervormingsbeleid van die “sosialistiese ANC” kom dikwels daarop neer “dat Afrikaners van hul boerderye verjaag word”.
Hy het verwys na Julius Malema, geskorste ANC-jeugleier, wat die liedjie met die woorde “dubul’ iBhunu” (“Skiet die Boer”) sing, en vervolg: “Aanvalle op boerderye is skering en inslag. Dan het ek dit oor plundering, verminking, marteling, verkragting en moord.”
Hy het vir Knapen gevra: “Wat is die visie van die kabinet oor die sogenaamde grondhervormings in Suid-Afrika? Hoe sien die adjunkminister die ontelbare aantal hektaar grond wat afgeneem en nou ongebruik is?
“Erken die kabinet dat Nederland ’n historiese band met die Afrikaners het? Is die kabinet bereid om die plaasmoorde te veroordeel en die Suid-Afrikaanse regering daaroor aan te spreek? En deel die onderminister die mening dat wanneer die ANC-bewind nie wil luister nie, alle ontwikkelingshulp aan Suid-Afrika stopgesit moet word?”
Knapen het erken daar is baie geweld in Suid-Afrika, wat die swart bevolking egter die meeste tref. Daar is volgens hom geen patroon van geweld teen die Afrikaners nie, en dit word nie deur die Suid-Afrikaanse owerheid georganiseer nie.
– Volg Nuus24 op Twitter
- Die Burger