Nederland moet opdok vir 1947-massamoord
2011-09-14 18:54
Den Haag – ‘n Nederlandse hof het die regering beveel om die weduwees van sewe mans wat in ‘n berugte massamoord tydens Indonesië se onafhanklikheidstryd tereggestel is, finansieel te vergoed.
‘n Man wat in die aanval gewond is, moet ook deur die staat vergoed word.
Die Den Haagse siviele hof het beslis dit is “onredelik” vir die staat om te argumenteer dat die weduwees nie tot vergoeding geregtig is omdat te veel tyd sedertdien verbygegaan het nie.
“Geregtigheid het geskied,” het Liesbeth Zegveld, ‘n regsverteenwoordiger vir die klaers, gesê. “Dit beteken die staat kan nie bloot vir sestig jaar sit en wag vir 'n saak om te verdwyn of die klaers om te sterf en dan die wet op beperkinge as argument gebruik nie.”
Die uitspraak het nou die weg gebaan vir ‘n volgende saak om die bedrag wat aan ander slagoffers se naasbestaandes betaal moet word, vas te stel.
Zegveld het gesê die toepassing van die uitspraak sal egter waarskynlik slegs vir die weduwees van slagoffers water dra en dit is steeds onduidelik of ander familielede ook nou op vergoeding kan aanspraak maak.
Die weduwees verdien vergoeding omdat hulle ten tyde van die Nederlandse pogings in 1947 om beheer oor Indonesië te behou, self in die dorp waar die massamoord plaasgevind het, was, het sy gesê.
Die regering het voorheen sy spyt oor die slagting in die dorp Rawagedeh in die westelike deel van Java uitgespreek, maar bygevoeg dat dit te lank terug gebeur het vir slagoffers om vergoeding te eis.
Die uitspraak het te laat gekom vir twee van die klaers. Een weduwee en ‘n man wat in die massa-teregstelling gewond is, is vroeër vanjaar dood.
– Volg Nuus24 op Twitter.
- SAPA