Naskok ruk Amerikaanse ooskus
2011-08-25 12:23
Washington – ‘n Naskok wat 4.5 gemeet het, het Donderdagoggend vroeg die Amerikaanse deelstaat Virginia en streke rondom die Amerikaanse hoofstad, Washington, geruk.
Die naskok het inwoners ontstel wat nog oor die skok van ‘n seldsame aardbewing kom wat twee dae gelede die ooskus getref het.
Die nasionale inligtingsentrum vir aardbewings sê die aardbewing het om 07:07 (SA tyd) plaasgevind.
Die episentrum was slegs 8 km suid vanaf Mineral, Virginia, waar die episentrum van Dinsdag se aardbewing van 5.8 was.
Geen skade is onmiddellik aangemeld nie.
Volgens plaaslike media het inwoners in die noorde van Virginia, Washington en Maryland die skudding gevoel.
Geboue in die Amerikaanse ooskus is nie gebou om aardbewings te weerstaan nie. Daarom kan ‘n naskok ná ‘n sterk aardbewing maklik swak strukture laat omtuimel – veral baksteenmure en skoorstene.
Die bekende Washington-monument het ‘n klein kraak opgedoen terwyl die nasionale katedraal in die hoofstad in Dinsdag se aardbewing ‘n stuk van ‘n toring verloor het.
Talle skole en ouer geboue van regoor die streek het ligte skade opgedoen.
Volg Nuus24 op Twitter.
- Sapa - AFP