NS-noodtoestand verleng
2010-09-08 03:00
Christchurch - Die noodtoestand in Christchurch, Nieu-Seeland, wat deur aardbewings geruk is, is met ‘n week verleng, het beamptes gesê nadat ‘n vlak naskok die stad Woensdagoggend geruk het.
“Ons is pas meegedeel dat die noodtoestand nog ‘n week van toepassing sal wees," het ‘n beampte van die Burgerverdedegingsministerie aan AFP gesê.
Hy kon nie bevestig of die verlenging ‘n direkte gevolg was van ‘n vlak 5.0-naskok wat die land se tweede grootste stad Woensdagoggend getref het nie. Die naskok het ontruimings genoodsaak en die toemaak van ‘n groot padtonnel meegebring.
Die noodtoetstand ná Saterdag se 7.0-aardbewing sou Woensdag om die middaguur verstryk het.
Die naskok het 07:49 vm die stad getref en inwoners die strate in laat skarrel.
Niemand is dood in Saterdag se aardbewing nie, hoewel heelwat inwoners noue ontkomings gehad het. Die Canterbury-gesondheidsdiens het gesê klein skrape en kneusmerke is opgedoen in Woensdag se naskok, maar geen ernstige beserings nie.
- Sapa - AFP