NS: Twee sterf toe helikopter neerstort
2011-12-01 10:00
Wellington – Twee mense het gesterf toe ‘n helikopter in die see beland het, het beamptes gesê.
Die ongeluk het gebeur toe die insittendes gehelp het om ‘n veldbrand, wat huise op Nieu-Seeland se noord-eiland verwoes het, te blus.
Die helikopter het Woensdagaand naby die Karikari-skiereiland in die noordelike deel van die noord-eiland vermis geraak.
Volgens die land se reddingsinstituut Rescue Coordination Centre NZ is die wrak vroeg Donderdagoggend gevind.
Die instituut sê die wrak is 7 m onderwater gevind. Rescue Coordination Centre NZ het ook bevestig dat die bemanningslede – ‘n kommersiële helikopter-vlieënier en ‘n veldwagter van die departement van bewaring – gesterf het.
Lance Johnson, hoof van die streek se brandweer, sê die brand het Woensdagaand uitgebreek. Hy vermoed brandstigting.
Daar word berig dat die brand onder beheer is.
Volg Nuus24 op Twitter
- Sapa - AFP