Mynwerkers gaan nie nou al hul harte uitstort nie
2010-10-16 06:48
Copiapó (Chili). – Die wêreld moet vir eers geduldig wag om te hoor hoe die 33 vasgekeerde myners 69 dae ondergronds oorleef het.
Dit lyk of hulle die storie aanvanklik net met hul naastes gaan deel. En as daar ’n boek of rolprent oor die verbluffende verhaal van oorlewing kom, sal die inkomste gelykop tussen al 33 verdeel word.
“Hulle gaan eers versigtig wees om onderhoude toe te staan en sal die stilte as ’n groep verbreek,” het mnr. Pablo Ramirez, ’n mynwerker wat die rotsstorting vrygespring het, gister gesê.
Die mynwerkers het glo ’n rekenmeester aangestel om boek te hou van inkomste wat uit openbare optredes kan volg sodat alles gelyk verdeel kan word.
’n Dogter van mnr. Omar Reygadas, me. Ximena Alejandra Reygadas, het gesê haar pa het gesê hulle mag nie sonder toestemming met die media praat nie.
Ná die opspraakwekkende bevryding is al die werkers per helikopter na ’n hospitaal in Copiapó gebring. Drie is gister ontslaan en die res sal na verwagting oor die naweek huis toe kan gaan.
Die adjunkdirekteur van die hospitaal, mnr. Jorge Montes, het gesê een van die mynwerkers wat nog in die hospitaal is, het longontsteking, twee het die longsiekte silikose en drie is vir tandheelkundige probleme behandel.
Volgens hom is die mans se gesondheid verrassend goed as hul omstandighede in ag geneem is.
By die huis wag “welkom tuis”-optogte, straatpartytjies en selfs troues. Me. Lilianett Ramirez se man, mnr. Mario Gomez, het haar in ’n brief uit die myn ’n “tweede” troue in ’n kerk belowe. “As dit God en die Maagd (Maria) se wil is, sal ons op 7 November trou, op sy verjaardag,” het sy stralend buite die hospitaal gesê.
By die myn het pres. Sebastian Pinera van Chili die reddingskag met ’n simboliese metaaldeksel bedek. Amptenare het gesê die skag sal verseël word en die toerusting verwyder word. Baie daarvan sal dalk later in ’n museum uitgestal word.
Volg Nuus24 op Twitter.
- Sapa - AP