Murdoch wil met advertensies jammer sê
2011-07-15 20:04
Londen – Die beleërde mediamagnaat Rupert Murdoch sal Saterdag advertensies in Britse nasionale koerante gebruik om om verskoning te vra vir "ernstige misdrywe" by sy News of the World-poniekoerant, het dié publikasie se moedermaatskappy, News International, gesê.
"Ons is jammer," sê die advertensie in groot swart letters op 'n wit agtergrond. 'n Afskrif van een van die advertensies is deur die maatskappy beskikbaar gestel.
Die advertensie, wat deur Murdoch self onderteken is, sal in sy Sun- en Times-koerante verskyn. Dit sal ook verskyn in die Daily Mail, Daily Telegraph, Financial Times en Independent, sowel as in die Guardian, die koerant wat gehelp het om die saak oop te vlek.
'n Sin onder die opskrif lui: "News of the World het ander tot verantwoording geroep. Maar dit het self gefaal.
"Ons is jammer vir die ernstige misdrywe wat plaasgevind het. Ons is innig jammer vir die hartseer van die individue wat daardeur geraak is.
"Ons is spyt ons het nie vroeër stappe geneem om die situasie uit te sorteer nie.
Murdoch beloof ook dat sy maatskappy meer verklarings oor die saak sal uitreik.
"Soos ons in die komende dae verdere konkrete stappe neem om hierdie sake op te los en om te vergoed vir die skade wat gely is, sal julle meer van ons hoor."
– Volg Nuus24 op Twitter.
- SAPA