Murdoch 'wil Britse koerante verkoop'
2011-07-15 07:01
Den Haag - In ’n poging om die politieke tsoenami wat op sy mediaryk afstorm te pypkan, oorweeg die magnaat Rupert Murdoch dit om ál sy Britse besittings te verkoop.
Só berig die Amerikaanse finansiële dagblad The Wall Street Journal, wat self deel van Murdoch se maatskappy, News International, is. Woensdag het Murdoch onder massiewe politieke druk afgesien van sy poging om die televisiemaatskappy BSkyB oor te neem.
Mediakomitee
Volgens die blad het Murdoch voelers uitgesteek na verskeie moontlike kopers van sy drie oorblywende Britse publikasies, te wete The Times, The Sunday Times en The Sun.
Die druk op Murdoch neem by die dag toe. Sy aankondiging dat hy en sy seun, James, nié voor die Britse laerhuis se mediakomitee sal verskyn om vrae oor die skandaal te beantwoord nie, het ’n storm van verontwaardiging uitgelok.
Die adjunkpremier, Nick Clegg, het aan BBC Radio gesê as die Murdochs “ ’n flenterjie verantwoordelikheid of verantwoordbaarheid vir hul magsposisie” wil toon, moet hulle voor die komitee verskyn.
Soos sake nou staan, kan hulle nie gedagvaar word nie omdat hulle nie Britse burgers is nie, maar Amerikaanse burgers.
Clegg het gesê dit gaan om iets veel groters as net die afluisterskandaal. Dis ’n simptoom van ’n veel wyer probleem, naamlik “dat verskillende dele van die nasionale stelsel – die pers, polisie, politici – eenvoudig te naby mekaar gekom het, te gemaklik met mekaar geword het”.
Een van die ander hooffigure in die skandaal, Rebekah Brooks, uitgewer van die pas gesluite News of the World, sal wel voor die komitee verskyn.
Intussen is die gewese uitvoerende redakteur van die News of the World Neil Wallis (60) in hegtenis geneem, het die Londense polisie in ’n verklaring gesê. Hy is by sy huis in die weste van Londen aangehou terwyl die polisie sy huis deurgesoek het.
Hy is die negende mens wat na aanleiding van die saak in hegtenis geneem word. Verlede Vrydag is Andy Coulson, ’n vorige redakteur en gewese mediawoordvoerder van premier David Cameron, ook aangehou.
Ontevredenheid
Sommige media het voorts hul ongemaklikheid met die opdrag aan die regterlike kommissie van ondersoek na mediapraktyke uitgespreek. The Independent het Donderdag in ’n hoofartikel gewaarsku dat die “onafhanklikheid, energie en oneerbiedigheid van die Britse pers kwaliteite is wat onder geen omstandighede gesmoor moet word deur ’n oorgretige begeerte om praktyke uit te wis wat reeds stafbaar in ’n hof is nie”.
– Volg Nuus24 op Twitter
- Die Burger