Murdoch vou onder kwaai druk
2011-07-14 07:14
Den Haag - Die mediamagnaat Rupert Murdoch het Woensdag opnuut gesteier onder ’n reeks hamerhoue wat moontlik die einde van sy maatskappy kan beteken.
Woensdagmiddag en -aand het die Britse laerhuis die magtige Murdoch in ’n mosie met die eenparige steun van die regerende koalisie en die opposisie aangesê om sy poging om die TV-maatskappy BSkyB oor te neem, te laat vaar.
Nadat ook die premier, David Cameron, Murdoch soos ’n baksteen laat val het, het Murdoch Woensdag aangekondig dat hy die poging laat vaar omdat dit te “gepolitiseer” geraak het.
Die laerhuis het gister gedurende vraetyd en die debat oor die ernstige kriminele oortredings van joernaliste uit Murdoch se News International-stal weerklink van verontwaardiging, maar ook selfondersoek.
Cameron het verskeie kere die hand in eie boesem gesteek en erken dat álle partye te veel witvoetjie by Murdoch en sy joernaliste gesoek het. Dié soort eensgesindheid oor partygrense heen is uiters seldsaam in Brittanje.
Cameron het voorts die opdrag aan die ondersoek-kommissie bekend gemaak. Die kommissie sal onder voorsitterskap van regter Brian Leveson staan en verskeie deskundiges oor die joernalistiek en ander aspekte rakende die ondersoek insluit.
Die kommissie sal die reg hê om mense te dagvaar om onder eed te getuig. Daar sal twee ondersoeke wees: een na die verhouding tussen die pers en die polisie, en een na die regulering van die pers.
Cameron hetdit opnuut duidelik gemaak dat die huidige stelsel van selfregulering van die pers nie werk nie. Hy is ook nie ten gunste van statutêre regulering “waar die staat se vingers oral te sien is nie”; eerder van ’n reguleerderliggaam wat onafhanklik van sowel die staat as die pers is.
Aanbevelings sal ook gedoen word oor die verhoudings tussen politici en die pers.
Cameron het voorts gesê alle skuldiges in die skandaal moet verhinder word om ooit eienaar van media te wees of ’n rol in die bestuur daarvan te speel. Waarnemers het dit vertolk as ’n dreigement in die rigting van Murdoch.
’n Invloedryke Amerikaanse senator, sen. Jay Rockefeller – ook voorsitter van die senaatshandelskomitee – het gevra dat ondersoek ingestel word na bewerings dat joernaliste van News International polisiebeamptes probeer omkoop het om die selfoonboodskappe van slagoffers van die terreuraanslae van 9/11 af te luister.
Hy het met “ernstige gevolge” die Murdoch-mediaryk gedreig as die bewerings waar sou wees.
– Volg Nuus24 op Twitter
- Die Burger