Murdoch: 'Nederigste dag van my lewe'
2011-07-19 18:28
Londen – Die hoof van News Corp., Rupert Murdoch, het Dinsdag aan Britse wetgewers gesê hy beleef die “nederigste dag van my lewe” aan die begin van ‘n palementêre verhoor oor die News of the World-afluisterskandaal.
Hy het egter geweier om uiteindelike verantwoordelikheid te aanvaar vir wat een wetgewer as die afluister-“fiasko”, wat gelei het tot die sluit van die 168-jaar-oue poniekoerant News of the World, bestempel het. News of the World was Brittanje se gewildste weeklikse koerant.
James Murdoch, Rupert Murdoch se seun en uitvoerende hoof van News Corp. se operasies in Europa en Asië, het gesê: “Ek wil graag meld hoe jammer ek is en hoe jammer ons is, veral aan die slagoffers van die onwettige onderskepping van selfoonboodskappe en hul families.
“Dit is ‘n kwessie van groot spyt vir my, my pa en almal by News Corporation.
“Hierdie optrede skiet tekort aan die standaarde waarna ons maatskappy oor die wêreld heen streef en ons is vasberade om dinge reg te stel, seker te maak dat hierdie dinge nie weer gebeur nie en om die maatskappy te wees waarna ek weet ons nog altyd gestreef het om te wees.”
Ondanks die verskonings wou Murdoch senior nie so ver gaan as om die uiteindelike verantwoordelikheid vir die skandaal te aanvaar nie.
Toe die wetgewer Jim Sheridan aan Murdoch gevra het: “Aanvaar jy dat jy, op die ou end, verantwoordelik is vir hierdie hele fiasko?” het Murdoch bloot geantwoord: “Nee”.
Die mediamagnaat het bygevoeg daar is “geen bewyse” dat daar onwettige toegang tot die stemboodskappe van slagoffers van die 9/11-aanvalle verkry is nie. Dié bewerings het daartoe gelei dat die FBI ‘n ondersoek in Amerika geloods het.
“Ons het nog geen bewyse daarvan gesien nie en soveer ons weet het die FBI ook nie,” het Murdoch senior gesê.
James Murdoch het gesê die maatskappy sal vinnig optree as nuwe bewyse van afluistering aan die lig kom, ná ‘n reeks siviele dagvaardigings in 2010.
“Na aanleiding van ons ontdekking van daardie inligting in een van dié siviele verhore, wat ek dink die Sienna Miller-saak was, het die maatskappy onmiddellik na bykomende rekords van die betrokke individu gaan kyk, die polisie in kennis gestel en die ondersoek wat nou aan die gang is, van voof af geloods,” het hy gesê.
Die wetmaker Tom Watson het Rupert Murdoch gevra of hy deur senior werknemers mislei is, waarop Murdoch geantwoord het: “Duidelik”.
Die 80-jarige Murdoch het gesê: “News of the World is minder as een persent van ons maatskappy. Meer as 53 000 mense oor die wêreld heen is in diens van die maatskappy en is trotse, etiese, professionele en voortreflike mense".
Hy het gesê hy was “absoluut geskok, gewalg en beskaamd toe ek gehoor het van die Milly Dowler-geval twee weke gelede”.
Hy het verwys na die geval van ‘n vermoorde tiener na wie se stemboodskappe News of the World onwettig toegang verkry het.
James Murdoch het aan die komitee gesê News International, die Britse koerant-afdeling van News Corp., het geen planne om ‘n nuwe Sondag-poniekoerant te stig om News of the World te vervang nie.
- Volg Nuus24 op Twitter
- Sapa - AFP