Motorbom naby radiostasie beseer 9
2010-08-12 20:14
Bogota - ‘n Motorbom het buite ‘n groot radiostasie en verskeie banke in Colombia se hoofstad ontplof, met vensters wat uitgebars het en minstens nege mense wat beseer is.
Geen sterfgevalle is gerapporteer nie.
Die bom het omstreeks 05:30 buite die Caracol Radio-gebou in die noorde van Bogota ontplof. Volgens die polisie was daar minstens 50 kg se plofstof in die motor.
Gen. Cesar Pinzon, die stad se polisiehoof, meen linksgesinde rebelle kon dié bom laat ontplof het. Hy sê egter die owerhede is nie seker of die ontploffing op die radiostasie of die nabygeleë bankgeboue gemik was nie.
Pres. Juan Manuel Santos het hom na die toneel gehaas. Hy het die ontploffing as “’n daad van terrorisme” bestempel en gesê dit is veronderstel om vrees te versprei en ‘n skeptiese ingesteldheid teenoor die regering te skep.
“Ons gaan aanhou om terrorisme te bestry met alles wat ons het,” het Santos, wat Saterdag ingetree het as president, gesê. Hy het Alvaro Uribe, wie se rowwe taktiek die linksgesinde groepe wat die regering bestry verswak het, vervang.
Die nege mense wat beseer is, is meestal vir snywonde behandel en ontslaan, maar drie mense word nog versorg. Die meeste van die beseerdes was op ‘n bus wat verbygery het toe die bom ontplof het.
- Sapa - AP