'Moslems sal Obama kelder'
2009-09-23 11:16
Kaïro - Al-Kaïda voorspel dat pres. Barack Obama deur Moslems ten gronde gebring sal word.
’n Nuwe video as deel van ’n reeks deur die terroristegroep uitgereik probeer weereens vergelykings tussen Obama en George W. Bush, die voormalige president van die VSA, tref.
Sommige kenners meen die diplomatieke hand wat Obama na die Moslem-wêreld uitsteek maak Al-Kaïda bekommerd.
Die Amerikaanse president se onlangse toespraak aan die Moslem-wêreld in Kaïro het die opinie in die Moslem-wêreld van die Westerse land begin verander.
Die VSA het in ongewildheid in dié kultuur verval tydens Bush se uitgerekte oorloë in die Midde Ooste.
"Amerika het ’n nuwe, skynheilige gesig op," het Al-Kaïda se tweede in bevel, Ayman al-Zawahri, in die video gesê. "(Die VSA) glimlag maar steek ons met dieselfde dolk as Bush.
"As dit God se wil is, sal jy jou einde aan die hand van die Moslem-nasie ontmoet."
- Sapa-AP