Moslems gedwing om vark te eet
2010-05-11 05:31
Taipei – Drie Moslems van Indonesië was “radeloos en bang” nadat hul baas by ‘n fabriek in Taipei hulle forseer het om oor ‘n tydperk van sewe maande varkvleis te eet, anders sal hulle gestraf word, het ‘n Taiwannese menseregtegroep Maandag gesê.
Aanklaers het Chang Wen-lin, die eienaar van Shin Hua Hang Fashion Co Ltd, aangekla omdat hy die drie vroue gedwing het om gedurende hul indiensnemingstydperk van September 2008 tot April 2009 varkvleis te eet.
Chang het glo beweer dat die vleis “die vroue meer stamina vir werk sal gee” en het gedreig om geld uit hul salaris te haal as hulle dit nie eet nie.
Islam verbied sy navolgers om vark te eet, aangesien varke as onrein beskou word.
Volgens Susan Chen van die Taiwan International Workers Association het hul organisasie vir drie tot vier maande van April 2009 vir die drie vroue gesorg nadat hulle ‘n klag by die Taipei provinsiale amptenare ingedien het en uit die fabriek verwyder is.
“Hulle was radeloos en bang toe hulle na ons skuiling gekom het, veral omdat hulle gedink het hulle gaan huis toe gestuur word,” het Chen gesê.
“Hulle was nog baie bang toe hulle vir die eerste keer weer met hul werkgewer moes praat gedurende ‘n vergadering om werksgeskille te bespreek.”
Chang was nie onmiddellik beskikbaar vir kommentaar nie.
Chang het die vroue glo oorspronklik gehuur as versorgers, maar hulle moes van 07:00 tot 23:00 in Chang se fabriek werk.
Hulle is ‘n gemiddeld van $42 (R313) per maand betaal – baie minder as die $530 (R3 950) minimum loon.
- AP