Mosie van wantroue teen Pakistanse premier
2012-01-13 19:27
Islamabad – Die Pakistanse parlement het aangekondig dat hy 'n mosie van wantroue teen Yousuf Raza Gilani, die land se premier, gaan stel, het RSG berig.
Daar is toenemende spanning tussen die regering en die weermag ná 'n memorandum ontdek is waaruit dit blyk dat die regering hulp van die Amerikaanse weermag sou vra om te help om die weermag in Pakistan se mag in te perk.
Volgens berigte sou Gilani glo ook na die weermag verwys het as 'n staat binne 'n staat.
Daar is verdere ongelukkigheid omdat Gilani na twee jaar steeds nie in opdrag van die land se hooggeregshof 'n ondersoek na korrupsie teen Asif Ali Zardari, die land se president, heropen het nie.
– Volg Nuus24 op Twitter.
– RSG