Moordaanklagte teen vyf verdagtes in Indiese verkragting

2013-01-01 08:48

Nieu-Delhi – Die polisie in Indië sal na verwagting vyf van die ses verdagtes wat na bewering betrokke was by die verkragting van 'n 23-jarige vrou op 'n bewegende bus in Nieu-Delhi, van moord aankla.

Die sesde verdagte is 'n minderjarige. Kinders onder 18 kan volgens Indiese wetgewing nie vir moord vervolg word nie.

'n Polisiebeampte wat nie sy identiteit bekend wou maak nie, het gesê toetse sal op die minderjarige gedoen word om sy ouderdom te bevestig.

Die vrou, 'n fisioterapie-student, is in Singapoer dood, waar sy in 'n hospitaal opgeneem is vir behandeling ná sy ernstige beserings opgedoen het toe sy op 16 Desember uit die bewegende bus gegooi is.

Rajan Bhagat, 'n woordvoerder vir die polisie in Nieu-Delhi, het Dinsdag gesê 'n klagstaat sal Donderdag by die hof ingedien word.

– Volg Nuus24 op Twitter.

- Sapa - AP