Britse gyselaarsdrama by bank

2010-06-28 19:42

Londen – Volgens die Britse polisie is ‘n gewapende man glo binne ‘n bank naby Londen se Heathrow-lughawe toegesluit.

Die Barclays-bank in Kerkstraat in Ashford, Middlesex is glo gesluit en daar is steeds verskeie kliënte binne.

Volgens die Surrey-polisie het hulle omstreeks 17:00 (SA-tyd) ‘n oproep ontvang dat ‘n gewapende man by die bank ingestorm het.

‘n Spesiale taakspan is uitgestuur na die bank om met die vermeende rower te onderhandel. Daar is egter nog geen duidelikheid of die polisie met die verdagte kon kommunikeer nie.

'n Ooggetuie het aan SkyNews vertel dat verskeie gyselaars reeds vrygelaat is. "Hulle hande was agter hulle rug vasgebind," het hy gesê.

'n Woordvoerder van Barclays-bank kon nie dadelik kommentaar lewer oor die voorval nie.

Hou Nuus24 dop vir meer inligting soos die storie ontvou.

Volg Nuus24 op Twitter.
 

- Sapa - AP