Monnik verkrag glo jong seuns

2010-04-16 07:10

Taipei - Polisie in Taiwan het ‘n Boeddhiste-monnik in hegtenis geneem op aanklag van die verkragting van ses seuns.

Slegs die monnik se van is bekendgemaak as Tang. Volgens die koerant United Daily News het hy Boeddhisme by sy huis toegepas en homself ‘Meester Tang’ genoem.

Sedert 2009 het Tang glo ses seuns na sy huis gelok om video-speletjies te speel en hulle toe verkrag. Hy het elkeen glo na die tyd sakgeld gegee in ruil vir hul stilte oor die verkragting.

Een van dié ses seuns het glo Donderdag sy ma van die voorval vertel en die polisie is in kennis gestel.

Tang is Donderdag in hegtenis geneem en het erken dat hy die ses seuns seksueel aangerand het.

- Sapa