Monnik tjoekie toe ná hy kaal vroue afneem
2010-09-18 13:30
Phnom Penh – ‘n Boeddhistiese monnik van Kambodja is tronk toe gestuur nadat hy honderde kaal vroue in die geheim afgeneem het terwyl hulle in heilige water by ‘n tempel gebad het, het ‘n regter Saterdag gesê.
Net Khai (37) is tot een jaar tronkstraf gevonnis nadat hy pornografie vervaardig en versprei het.
Bewerings het aan die lig gekom dat hy meer as 600 vroue verfilm het wat heilige water in ‘n badkamer in ‘n pagode oor hulself spoel.
Regter Kim Dany het gesê die voormalige monnik is Vrydag tronk toe gestuur weens klagtes van ‘n 23-jarige slagoffer wat die polisie genader het.
Sy het hulle vertel dat mense video’s van dié vroue op hul selfone met mekaar deel.
Drie ander vroue het daarna ook hof toe gegaan om klagtes te lê.
Volgens die regter het die hof Khai met sowat R3 500 beboet en hom beveel om die slagoffer met sowat R70 000 te vergoed.
Hy het steeds soortgelyke aanklagte van die drie ander vroue teen hom, het die regter gesê.
Volg Nuus24 op Twitter.
- Sapa - AFP