Moltrein-ontploffing: Dodetal styg tot 11
2011-04-11 21:19
Minsk - Elf mense is dood en ongeveer 100 mense is beseer in ‘n ontploffing by ‘n metro-stasie in die hartjie van Minsk, die hoofstad van Belarus, het President Alexander Lukashenko Maandag gesê.
Dié ystervuis-leier het aan ‘n noodvergadering oor veiligheid gesê ongeveer 100 mense is beseer in dié ontploffing, wat net buite sy kantoor en woonkwartiere plaasgevind het.
Lukashenko het ‘n oomblik van stilte aangevra ter nagedagtenis aan die slagoffers.
Die adjunk-aanklaer van Belarus, Andrei Shved, het aan die RIA Novosti-nuusagenstkap gesê die ontploffing hou verband met terrorisme.
“Vandag, omstreeks 17:54, het ‘n daad van terreur die Oktyabrskaya-stasie getref,” het Shed, wat in beheer is van die span wat die ontploffing ondersoek, gesê.
- Volg Nuus24 op Twitter
- Sapa - AFP
