Mladic te siek vir vergadering
2011-11-10 21:55
Den Haag – Ratko Mladic het by die regters van die internasionale
tribunaal vir die voormalige Joego-Slawië (ICTY) gekla dat hy té siek is om 'n vergadering ter voorbereiding vir die hofsaak teen hom by te woon.
Die ICTY oorweeg dit om hom vir mediese
toetse te stuur om uit te vind of hy werklik te siek is om in die hof te
verskyn.
Ratko Mladic, voormalige Bosniese Serwiese
weermaghoof, word verhoor op aanklag van volksmoord, oorlogsmisdade en misdade
teen die mensdom.
Hy het aangedui dat hy te siek was om ‘n
vergadering ter voorbereiding van die hofsaak by te woon.
'n Dokter by die ICTY-gevangenis, waar Mladic in aanhouding
is, het bevestig dat die voormalige generaal se gesondheid baie sleg is.
Hy het gesê dat Mladic simptome toon van 'n siekte en het voorspel dat dit ‘n geruime tyd sal
neem vir Mladic om sterk genoeg te wees vir enige vergaderings.
Mladic se gesondheid het tot nou die
verrigtinge oorheers en volgens die verdediging is dit betwyfelbaar of Mladic
nog lewend sal wees teen die tyd dat die hofsaak tot 'n einde kom.
Die hofsaak is veronderstel om vroeg volgende
jaar te begin.
Volg Nuus24 op Twitter.
- Sapa-DPA