'Mladic sal sterf voordat verhoor begin'
2011-05-30 15:10
Belgrado – Die vermeende oorlogsmisdadiger Ratko Mladic, wat van volksmoord aangekla word, is só siek dat hy nie eens die begin van sy verhoor sal sien nie.
Só het Milos Saljic, Mladic se regsverteenwoordiger, Maandag gesê.
Die prokureur het Maandag gevra dat die 69-jarige Mladic deur dokters ondersoek moet word.
Mladic, Europa se mees gesoekte oorlogsmisdaad-vlugteling, is Donderdag in hegtenis geneem. Hy was amper 16 jaar lank voortvlugtig.
Daar word ook berig dat hy minstens twee beroertes gehad het.
Bruno Vekaric, Serwië se adjunk-staatsaanklaer van oorlogsmisdade, is van mening dat Mladic net die verhoor probeer vertraag.
Hy sê niks behoort Mladic se uitlewering aan die internasionale oorlogsmisdaadshof in Den Haag, Nederland, te keer nie.
Die Verenigde Nasies (VN) se tribunaal het Mladic in 1995 van volksmoord aangekla. Die VN beskuldig hom daarvan dat hy die slagting van 8 000 Moslem mans en seuns in Srebrenica georkestreer het.
Mladic word ook van ander oorlogsmisdade tydens die Bosniese oorlog (1992 – 1995) beskuldig.
Volg Nuus24 op Twitter.
- Sapa - AP