Minstens nege dood ná militêre vliegtuig neerstort
2013-02-19 16:45
Sanaa – Minstens nege mense is dood en 18 is beseer toe ‘n militêre vliegtuig van Jemen Dinsdag in ‘n woonbuurt in die land se hoofstad Sanaa geval het, het mediese- en sekuriteitsbeamptes gesê.
Die vliegtuig het tydens ‘n opleidingsoefening geval, het Mohammed al-Mawry, woordvoerder vir die ministerie van binnelandse sake, gesê.
Dit het twee huise in die al-Qadissiya-streek getref, het hy gesê. Die vlieënier is glo ook in die ongeluk dood.
Die woordvoerder het nie ‘n oorsaak vir die ongeluk gegee nie, maar sê militêre kenners ondersoek die ongeluk.
Ahmed Fathi, ‘n ooggetuie, het gesien hoe vyf verkoolde lyke deur ‘n ambulans weggeneem word. Fathi, wat in die woonbuurt woon, het ook gesê twee huise is geheel en al in die ongeluk vernietig en daar is glo nog mense onder die puin.
Die woonbuurt is naby aan die hoof stadsplein wat die middelpunt van Jemen se opstand en betogings was in die afgelope twee jaar.
Mediese beamptes, wat op die voorwaarde van anonimiteit gepraat het, het gesê die burgerlikes wat in die ongeluk dood is, sluit in drie vroue, twee kinders en vier mans. Daar is glo nog slagoffers onder die puin.
– Volg Nuus24 op Twitter
- Sapa - AP
