Minstens 200 gered ná veerboot sink
2012-02-02 09:23
Port Moresby, Papoea-Nieu-Guinee – Reddingswerkers het Donderdag meer as as 200 mense uit die see by Papoea-Nieu-Guinee gered nadat 'n veerboot, die MV Rabaul Queen, gesink het.
Meer as 100 mense is steeds vermis en daar word vermoed dat talle gesterf het, het owerhede in Australië gesê.
"Dit is 'n reuse-tragedie - 350 mense aan boord van 'n skip wat gesink het," het Julia Gillard, premier van Australië, aan verslaggewers in Melbourne gesê.
Australië se Maritieme Veiligheidsowerheid het gesê altesaam 219 mense is gered nadat agt skepe en drie helikopters gebruik is om die gebied te fynkam.
Die skip se eienaars, Rabaul Shipping, het gesê hy weet nie wat die ongeluk veroorsaak het nie.
– Volg Nuus24 op Twitter.
- Reuters