Minister maan oor smokkel van terroriste
2010-11-11 09:07
Den Haag - ’n Dringende waarskuwing dat 20 Islamitiese terroriste na Europa wil deurdring om aanvalle uit te voer, weerklink die laaste dae veral in Duitsland.
Die waarskuwing kom van die Duitse minister van binnelandse sake, Thomas de Maizière, wat burgers ’n paar dae gelede versoek het om enigiets verdags in hul omgewing by die polisie aan te meld. Daar is “aanwysings van aanslae in Europa wat ons ernstig moet opneem”, het hy gesê.
Dié waarskuwing het hy ’n dag later op die maandelikse vergadering van die Europese Unie (EU) se ministers van binnelandse sake in Brussel herhaal.
Die aanleiding vir die waarskuwing was die ontdekking van ’n bompakket uit Griekeland in die kantoor van die bondskanselier, dr. Angela Merkel.
Luidens berigte, wat glo gegrond is op inligting van die Duitse en Amerikaanse intelligensiedienste, sou Al-Kaïda aanslae in Europese stede beplan.
Die vinger word gewys na ’n Pakistanse burger, Mohammed Iljas Kasjmiri, wat na bewering 20 terroriste na Europa wil smokkel om stede soos Berlyn, Parys en Londen tegelykertyd aan te val. Die plan is blykbaar ook om vyf “slaperselle” te stig wat voorlopig op die agtergrond moet bly en later toeslaan wanneer die bevel gegee word.
Volg Nuus24 op Twitter
- Die Burger