Min hoop vir onteerde Murdoch
2011-07-24 07:00
Johannesburg - Rupert Murdoch se seun gaan dalk binnekort ’n tweede keer voor Britse parlementslede moet getuig, in die VSA word al hoe meer vrae oor die wenslikheid van sy bedrywighede gevra, en nou is daar selfs ’n ligte herrie oor of hy Bybels mag verkoop.
Soos wat die donker wolk oor die mediamagnaat Murdoch die afgelope week toegeneem het in die nadraai van die News of the World-skandaal (die koerant het onder meer op terreurslagoffers se foongesprekke ingeluister) val die soeklig toenemend op Murdoch se belange in die VSA. Sy seun, James Murdoch, die voorsitter van News International wat News of the World besit het, het pas gehoor die Britse parlement is nie tevrede met sy verskoning dat hy niks van die meeluistery geweet het nie en wil hê hy moet weer kom verduidelik.
In Brittanje loop die gemoedere teen die Murdochs nou so sterk dat die Britse Olimpiese span, wat News International vroeër as mediavennoot gekies het vir volgende jaar se Olimpiese Spele, nou aangekondig het hulle gaan dié bande verbreek.
Die Murdochs se ongewildheid kring ook vinnig uit na Amerika, waar hulle onder meer die eienaars van die groot TV-netwerk Fox is.
Hoewel baie linkses ongelukkig oor Fox se konserwatiewe politiek is, het koerante soos USA Today en The Salt Lake Tribune oor die afgelope week in rubrieke op ’n meer kommerwekkende tendens gewys, naamlik die toenemende fokus op seks en sensasie op dié netwerk. Dit is iets wat volgens hulle daarop dui dat die benadering van Murdoch se Britse poniekoerant ál meer in sy Amerikaanse filiale ook opduik.
In Amerika besit Murdoch ook een van die grootste poniekoerante, New York Post.
Op die Christelike blogosfeer het ’n debat boonop losgebars nadat dit aan die lig gekom het dat Murdoch se News Corporation die uitgewer Harper Collins besit, wat die eienaar is van Zondervan, een van die grootste Christelike uitgewers. Op die blog Holy Moly is Murdoch nou selfs al deur Will Braun, oudredakteur van die tydskrif Geez, beskryf as ’n “Bybelmagnaat”, terwyl USA Today se religieuse blog, Faith and Reason, lui: “Sal jy ’n Bybel koop by Rupert Murdoch? ... Jy het waarskynlik al!”
Braun skryf: “Wat moet ons daarvan dink dat ons, elke keer as ons ’n Zondervan-produk koop, bydra tot Murdoch se mag en sy persoonlike fortuin van $6,3 miljard (sowat R43 miljard)?”
- Saamgestel uit: USA Today, The Salt Lake Tribune, Reuters
Volg Nuus24 op Twitter.
- Rapport