Miljoene ontruim weens tifoon in China
2012-08-08 10:45
Beijing – Minstens twee mense is dood en meer as 1,8 miljoen mense is ontruim nadat tifoon Haikui die ooste van China Woensdag met stormsterk winde en swaar reën geteister het.
Haikui is die derde tifoon wat die land in een week tref en het Dinsdag (19:20 GMT) in die Hepu- informele nedersetting in die Zhejiang-provinsie begin, het die provinsiale meteorologiese observatorium gesê.
Die tifoon het winde van tot 150 km/h en branders van tot 5 meter op die kus veroorsaak, het die agentskap gesê.
Twee mense is in Shanghai dood nadat hulle deur vallende puin getref is, het die plaaslike Dushi Kuaibao-koerant berig.
In Zhejiang is sowat 1,5 miljoen mense uit vatbare dele ontruim terwyl die tifoon genader het. Die Shanghai-streek het 374 000 mense ontruim, het die regering gesê.
Die winde het ‘n Ferriswiel in Ningbo omgewaai en die dak van ‘n stadion in Jiaxing afgeruk.
Meer as 1 000 toeriste was bo op ‘n berg in Anxi gestrand, het die staatsmedia berig.
Die hoof lughawe in die provinsiale hoofstad, Hangzhou, was tot 15:00 gesluit en hoëspoed treindienste in die streek was opgeskort.
Minstens 25 mense is dood en verskeie is vermis in sentraal- en noordoos-China nadat die tifone Saola en Damrey die streke tussen Vrydag en Maandag getref het.
– Volg Nuus24 op Twitter
- Sapa-DPA
