Mexiko: Verdagte vas wat politikus se seun vermoor
2012-11-02 10:18
Mexiko Stad – Soldate in Mexiko het 'n vermeende lid van 'n dwelmbende, wat verdink word van die moord op die seun van 'n voormalige politieke hoof, in hegtenis geneem, het die ministerie van verdediging Donderdag gesê.
Carlos Arnulfo Flores (El Flaco) en sy vriend Fantasma is aangekeer nadat hulle lig gewond is tydens 'n skietery met soldate in die noordelike staat van Coahuila, het die ministerie gesê.
Die ministerie het in 'n verklaring gesê Flores is verlede maand deur die Zetas-dwelmbaas, Miguel Angel Trevino Morales, beveel om Jose Eduardo Moreira (25) uit weerwraak vir sy neef se dood te vermoor.
Die slagoffer is die seun van Humberto Moreira, wat vanaf 2005 tot 2011 die goewerneur van Coahuila was en verlede jaar die pos as voorsitter van die magtige PRI-party vir nege maande beklee het. Hy is ook die neef van Coahuila se huidige goewerneur, Ruben Moreira.
Moreira se lyk is op 3 Oktober in Ciudad Acuna, 'n stad teenaan die grens met Amerika, gevind met twee kopskote en tekens van marteling.
Die ministerie van verdediging het gesê 'n polisiebeampte, wat sedertdien ook aangekeer is, het Moreira in 'n hinderlaag gelei om hom aan Flores en twee ander moordenaars te oorhandig.
Volg Nuus24 op Twitter.
- Sapa - AFP
