Mexiko: Storm oor minister wat glo dwelm-geld aanvaar
2012-11-29 12:39
Mexiko-stad – Genaro Garcia Luna, Mexiko se minister van verdediging, het ontken dat hy omkoopgeld aanvaar het van ‘n dwelmhandelaar.
Die dwelmhandelaar beweer dat Luna sedert 2002 al omkoopgeld aanvaar. Hy het die onthullings in ‘n brief aan ‘n koerant gemaak.
Jose Ramon Salinas, die departement van verdediging se woordvoerder, het egter Woensdag aangevoer dat die brief, wat geskryf is deur die dwelmbaas Edgar Valdez Villarreal, daarop gemik is om optrede teen kriminele organisasies te onderduk.
Villareal probeer amptenare afpers in 'n poging om sekere voorregte te verkry in die tronk waar hy aangehou word in verband met dwelm-verwante moorde, het Salinas bygevoeg.
Die bewerings kom ‘n dag voordat Enrique Pena Nieto die leisels oorneem as president van Mexiko.
Nieto het al aangedui dat hy dit oorweeg om die departement van verdediging te ontbind, en dit by die departement van binnelandse sake in te lyf.
Villareal het ook in sy brief beweer dat verskeie amptenare goedere waarop beslag gelê is, vir hulself gehou het.
– Volg Nuus24 op Twitter
- Sapa - AFP
