Mexikaanse skoonheid sterf in skietgeveg
2012-11-27 14:47
Mexiko – ‘n 22-jarige Mexikaanse skoonheidskoningin is dood tydens ‘n skietgeveg tussen soldate en ‘n bende saam met wie sy glo in 'n voertuig was.
Die voorval het in die Sinaloa-provinsie plaasgevind, het aanklaers Maandag gesê.
Amptenare vermoed Maria Susana Flores, wat in 2012 die wenner van die Woman of Sinaloa-skoonheidskompetisie was, was deel van die bende. Sy het glo self ‘n wapen afgevuur in Saterdag se geweld. ‘n AK-47 is langs haar lyk in die bende se motor gevind.
“Sy was deel van die bende wat met soldate gebots het,” het Marco Antonio Higuera Gomez, ‘n staatsaanklaer, tydens ‘n mediakonferensie gesê.
Twee mans en twee vrouens, insluitend Flores, is saam met ‘n soldaat in die skietgeveg dood.
Die media in Mexiko berig Flores het saam met haar kêrel, ‘n huurmoordenaar, en ander bendelede in die motor gery toe ‘n skietery begin het.
Die bende werk glo vir ‘n bekende dwelmsindikaat in die land.
– Volg Nuus24 op Twitter
- AFP
