Mensvleis 'as volstruisvleis verkoop'
2012-05-25 12:14
Beijing – Die polisie in die suidweste van China het ‘n man in hegtenis geneem wat glo meer as 12 seuns en jong mans vermoor het, hul lyke opgekap en die vleis aan onwetende verbruikers verkoop het, is Vrydag bekendgemaak.
Zhang Yongming (56) is twee weke gelede in die dorp Nanmen, in die Yunnan-provinsie vasgetrek en word in verband met die moord van ‘n 19-jarige man ondersoek, het die Guangxi News-webtuiste berig.
Volgens die webwerf het die polisie die 19-jarige man, wat laat in April vermoor is, se selfoon, bankkaart en ander bewyse gevind, toe hulle Yongming se huis deursoek het. Talle ander jongmense in die dorp is die afgelope jare as vermis aangemeld.
Yongming het voorheen byna 20 jaar tronkstraf vir moord uitgedien.
Volgens berigte het hy in die dorp as die “kannibaal-monster” bekendgestaan.
Inwoners het glo groen plastieksakke aan sy huis sien hang, wat gelyk het soos wit bene wat uitsteek.
Die plaaslike polisie wou nie kommentaar lewer toe AFP hul Vrydag gekontak het nie en het gesê inligting sal op “’n geskikte tyd” beskikbaar gemaak word.
Die Hongkongse koerant The Standard het Vrydag berig dat die polisie mense se oë in wynbottels gevind het toe hulle Yongming se huis deursoek het.
Die polisie vermoed dat hy mensvleis aan sy drie honde gevoer het terwyl hy die ander stukke vleis by 'n mark as "volstruisvleis" verkoop het, het The Standard berig.
Twee spanne kenners is na Nanmen ontplooi om ondersoek in te stel oor die vermiste tieners.
– Volg Nuus24 op Twitter.
- AFP
