Meisie (16) kry lyfstraf oor voorhuwelikse seks
2012-09-04 09:44
Male – ‘n Hof in die Maledive het beveel dat ‘n 16-jarige meisie wat erken het sy het voorhuwelikse seks gehad, in die openbaar lyfstraf moet ontvang, het beamptes Dinsdag gesê.
Die tiener, wie se naam nie bekend is nie, is onder die Sharia-wet skuldig bevind nadat haar familie gekla het dat sy in Julie met ‘n 29-jarige man seks gehad het.
Die man is Sondag in ‘n hof in Raa tot 10 jaar tronkstraf gevonnis.
‘n Beampte van die hof sê die meisie kan weier om die houe te ontvang en sal dan kragtens plaaslike wette tot agt maande se huisarres gevonnis word.
Die hof het beveel dat sy die lyfstraf moet ontvang wanneer sy 18 jaar oud word.
“In die meeste gevalle sal die oortreders lyfstraf kies as deel van hul boetedoening,” het ‘n beampte van die hof gesê.
Die jongste hofbeslissing kom 10 maande nadat Navi Pillay, die VN se hoëkommissaris vir menseregte, die Maledive aangemoedig het om dié straf vir vroue wat voorhuwelikse of buite-egtelike seks het, te staak.
Pillay het tydens ‘n besoek aan die land gesê die Maledive het vooruitgang gemaak in die beskerming van Moslems se regte, maar dat meer gedoen moet word om vroue te beskerm.
– Volg Nuus24 op Twitter
- Sapa - AFP
