'Mehsud is dood' - VSA
2009-08-09 16:58
Washington - Die Verenigde State is byna seker die Pakistanse Talibankrygsheer Baitullah Mehsud is dood, en dat ‘n magstryd tans woed in dié organisasie, aldus die Withuis se nasionale veiligheidsraadgewer, James Jones.
Bewerings oor Mehsud se lot doen die ronde sedert ‘n CIA-missielaanval verlede week op sy skoonpa se huis in Pakistan.
"Mehsud was ‘n baie slegte man, ‘n regte boef," het Jones gesê.
Jones het op drie Amerikaanse kletsprogramme verskyn, en gesê die VSA is 90% seker dat Mehsud gesterf het.
Pakistanse owerhede is ook oortuig dat Mehsud gesterf het. Regerings- en intelligensiebeamptes, sowel as ‘n paar Taliban-bevelvoerders, het gesê daar is sterk aanduidings dat Mehsud wel dood is.
Ander Taliban-bevelvoerders het dié stellings egter ten sterkste ontken.
Boonop het teenstrydige gerugte ook die ronde begin doen dat ‘n geveg ontstaan het tussen Taliban-groepe tydens ‘n vergadering om ‘n plaasvervanger te soek vir Mehsud, en dat een of twee van die mees waarskynlike kandidate, Hakimullah en Waliur Rehman, gewond of selfs gedood is.
Jones kon nie dié bewerings bevestig nie, maar het erken dat ‘n leierskapstryd tot die VSA se voordeel kon strek.
- AP