Media het die reg om vrae te stel, sê Merkel
2012-01-20 09:10
Den Haag – Die Duitse bondskanselier, dr. Angela Merkel, het die Duitse media se harde aanpak van die korrupsieklagte teen die seremoniële staatshoof, pres. Christian Wulff, verdedig.
In ’n radio-onderhoud wat wye aandag getrek het, het sy gesê Duitsland is ’n vrye, demokratiese land. “Daarby hoort uiteenlopende media wat die reg het om vrae te stel.”
Daarteenoor is dit Wulff se plig om antwoorde te verskaf.
Dié houding staan in skrille kontras met die kritiek wat in talle outoritêre Europese lande – onder meer Rusland en Hongarye – uitgespreek word op die rol van die media in die oopvlek van wantoestande.
Dit is ook ’n aanduiding dat Merkel haar steun aan Wulff onttrek het. Haar beleid, so lyk dit, is om Wulff nie openlik te laat val nie, maar om die openbare druk sodanig te laat aanwas dat hy self bedank.
’n Gewese regter van die grondwetlike hof, regter Dieter Grimm, het Wulff ook Donderdag in ’n meningsartikel in die gerespekteerde Frankfurter Allgemeine Zeitung aangeraai om in sy eie belang te bedank.
Wulff breek homself af met die voortdurende leuens waarop hy betrap word, het Grimm te kenne gegee.
Die media het die laaste weke verskeie gevalle oopgevlek waar Wulff, terwyl hy nog premier van die deelstaat Nedersakse was, by praktyke betrokke was wat óf korrup was of daaraan gegrens het.
Erger nog, hy het sedertdien verskeie leuens vertel om hom daaruit los te wikkel – wat op hul beurt onmiddellik genadeloos aan die kaak gestel is.
Merkel het voorts gesê sy verstaan die rol van die media as “bemiddelaar tussen die politici en die bevolking”. Daaruit lei sy die verpligting af wat politici het om álle vrae wat aan hulle gerig word, oortuigend te beantwoord.
– Volg Nuus24 op Twitter.
- Die Burger