McAfee wil terug na VSA

2012-12-10 07:18

Guatemalastad – Die Amerikaanse sagteware-pionier John McAfee het Sondag gesê hy het 'n aansoek by die regering van Guatemala ingedien om uitlewering aan Belize te vermy.

Hy hoop om na die VSA terug te keer.

"Wat ons doen is om 'n paar aansoeke by die hof in te dien om te poog om my lank genoeg hier te hou vir die wêreld om te sien watter ongeregtigheid dit sal wees om my terug na Belize te stuur," het McAfee in 'n aanlyn nuuskonferensie gesê.

McAfee is in Guatemala in hegtenis geneem in verband met ’n moordondersoek in Belize.

Hy was drie weke voortvlugtend en het die grens na Guatemala oorgesteek om die owerhede in Belize te ontwyk. Hulle wil hom as ’n “persoon van belang” in die ondersoek na die moord op die Amerikaner Gregory Faull ondervra.

"Ek het nooit 'n langtermynplan gehad nie. Ek wil net gemaklik lewe, dag vir dag; [ek wil] visvang, swem, en my laaste jare geniet."

'n Terugkeer na die VSA "is nou my enigste hoop," het hy gesê.

"Ek sal baie bly wees om na Amerika te gaan – Amerika is my tuiste. Dis waar ek grootgeword het, dis presies wat ek wil hê," het hy gesê.

– Volg Nuus24 op Twitter.

- Sapa - AFP