Massamoordenaar eis 'beloning'

2012-10-16 13:01

Den Haag – Radovan Karadzic, ‘n voormalige Bosnies-Serwiese leier, het aan die VN se Joego-Slawiese oorlogsmisdaadtribunaal gesê dat hy beloon moet word omdat hy alles gedoen het om oorlog te vermy.

“Ek moet beloon word vir al die goeie dinge wat ek gedoen het, want ek het allles in my mag gedoen om oorlog te vermy en die mense se lyding te verminder,” het Karadzic in die hof in Den Haag gesê.

Karadzic is in 2008 in hegtenis geneem en word verhoor vir sy rol in die slagting van sowat 8 000 Moslem-mans en seuns in Julie 1995 in die ooste van Bosnië.

Dit was die ergste slagting in Europa sedert die Tweede Wêreldoorlog.

Alhoewel Karadzic nie ontken dat die slagting plaasgevind het nie, bevraagteken hy die aantal slagoffers en beweer hy dat hy nie bewus was dat Bosnies-Serwiese soldate hul gevangenes sou teregstel nie.

Karadzic word ook verhoor vir sy rol in die 44 maande lange besetting van die stad Sarajewo tussen Mei 1992 en November 1995. Sowat 10 000 mense is tydens dié besetting dood.

– Volg Nuus24 op Twitter
 

- Sapa - AFP