Massamoord-soldaat glo 'helder van verstand'

2012-11-06 09:23

Washington – 'n Amerikaanse soldaat wat daarvan aangekla word dat hy vroeër vanjaar 16 Afgane vermoor het, was "helder van verstand" en het erken dat hy die moorde gepleeg het, het aanklaers tydens die soldaat se eerste hofverskyning in Washington gesê.

Stafsersant Robert Bales (39) het whiskey gedrink en 'n geweldadige aksieprent saam met sy kamerade op televisie gekyk voordat hy die kamp twee keer verlaat het om die inwoners, waarvan die meeste vroue en kinders was, van twee nabygeleë nedersettings te vermoor, het die aanklaers gesê. 

Sy vrou en prokureur beweer dat Bales, 'n veteraan van die oorloë in Irak en Afganistan, nie kon onthou wat hy op die aand van 11 Maart in die Panjwayi-distrik van die Kandahar-provinsie gedoen het nie.

Aanklaers het die bewering egter Maandag, aan die begin van die twee weke lange verhoor om te bepaal of Bales in 'n krygshof verhoor moet word, weerlê.

Bales kan die doodstraf opgelê word indien hy skuldig bevind word.

Volg Nuus24 op Twitter.

- Sapa - AFP