Man wen miljoene in lotery, gooi kaartjie weg
2012-09-14 11:03
Wellington – ‘n Man van Nieu-Seeland het ‘n loterykaartjie met wennommers vir 'n prys van NZ$27 miljoen (R185 miljoen) weggegooi nadat hy die verkeerde nommers gelees het en gedink het die kaartjie is niks werd nie.
Die volgende dag, toe hy uitvind niemand het die prys opgeëis nie, het hy na sy kaartjie gesoek en gesien hy is die wenner.
Die man, wat in sy twintigs is en nie geïdentifiseer wil word nie, het die kaartjie op die ingewing van die oomblik gekoop. Hy sou die geld gebruik het om sy hare te laat sny, maar toe die salon toe is, het hy besluit om die kaartjie te koop.
“Ek het aanvanklik na die nommers op my selfoon gekyk, maar moes na die verkeerde trekking gekyk het en het gedink ek het dit gemis. Ek het dit eenkant gegooi en gedink, ‘dis dit’ en toe is ek werk toe,” het hy Vrydag aan die Fairfax-nuusagentskap gesê.
“Eers toe so baie mense in die dorp oor die prysgeld praat wat niemand opgeëis het nie, het ek gedink ek moet dalk weer na die kaartjie kyk.”
Die prys van NZ$27 miljoen is saamgestel uit NZ$25 592 110 kontant (R176 miljoen), ‘n Lamborghini Gallardo, ‘n Audi Q7, ‘n motorboot, ‘n kredietkaart met NZ$50 000 (R343 000) sowel as NZ$50 000 se reisgeld en NZ$675 000 (R4,6 miljoen) vir ‘n vakansiehuis.
– Volg Nuus24 op Twitter
- Sapa - AFP
