Man wat gyselaar aanhou kort-kort op Facebook
2011-06-23 10:06
New York – Ene Jason Valdez van Ogden van Utah het die polisie in Salt Lake City vir 16 uur besig gehou toe hy 'n vrou gyselaar geneem het – maar hy het nogtans elke nou en dan ‘n tydjie vir Facebook afgeknyp.
Die drama het begin toe die polisie verlede Vrydag probeer het om Valdez ‘n lasbrief in verband met die besit van onwettige dwelms te beteken ná hy ‘n hofverskyning misgeloop het.
Hy het 'n vrou gyselaar geneem en homself in ‘n hotelkamer toegesluit – en sommer vriende via sy Facebook-profiel op hoogte gehou soos die situasie ontvou het.
“Hulle het die krag afgesit en ons fone raak pap,” het hy op die sosiale netwerk laat weet.
“Ek sal julle op hoogte hou tot hierdie klomp (die polisie) ‘n dom fout maak! Ek het hulle gesê ek sal uitkom as ek reg is!” het hy later geskryf.
Valdez het ook twee foto’s van sy gyselaar opgelaai en meer as ‘n dosyn Facebook-vriende tussen Vrydagaand en Saterdagoggend bygekry.
“Ek sou die meisie laat gaan het, maar die dom vloekstene het in die kamer probeer inkom ná ek hulle gesê het hulle moenie. Ek het ‘n paar skote afgevuur en nou begin ons weer van voor...”
Die konfrontasie het geëindig toe polisie die kamer ingebars het en Valdez homself met ‘n pistool in die bors geskiet het.
Hy is tans in ‘n kritieke toestand in die hospitaal.
Lees meer hier.
Volg Nuus24 op Twitter.